Acts 20
Paul e hana gi nia henua go Macedonia mo Achaia
1I muli hua di hinihini ne lawa, Paul ga gahi mai digau ala ne hagadonu gi di gowaa e dahi, ga helekai hagamaaloo aga nadau manawa, ga hai dana hagaaloho gi digaula. Gei mee ga hana gi Macedonia. 2Mee ga hana laa lodo nia guongo, ga hai ana agoago e logo e hagamaaloo aga nia manawa o nia daangada. Nomuli, gei mee ga dau i Achaia, 3ga noho i golo nia malama e dolu. Mee gu hagatogomaalia belee hana gi Syria, gei di madagoaa hua deelaa, mee gu modongoohia bolo digau o Jew belee lawalawa ia, mee gu maanadu bolo ia ga hanimoi labelaa gi muli laa lodo tenua go Macedonia. 4Sopater, tama daane Pyrrhus, tangada mai Berea, gu hana madalia a mee, ngaadahi mo Aristarchus mo Secundus, nia daangada o Thessalonica, mo Gaius mai Derbe, Tychicus mo Trophimus mai tenua go Asia, mo Timothy. 5Digaula huogodoo gu hula i mua, ga talitali laa gimaadou i Troas. 6Gimaadou ne dele mai i Philippi i muli Tagamiami o di Palaawaa Digi Hagatanga ne lawa, gei i muli nia laangi e lima, gimaadou ga heetugi gi digaula i Troas, ga noho i golo tabu e dahi.Di haga muliagina Paul dono hana gi Troas
7Hiahi di ono laangi, gimaadou gu dagabuli gi di gowaa e dahi belee miami i di palaawaa. Gei Paul ga helekai gi nia daangada, ga helehelekai ga dae loo gi di madahidi waelua di boo, idimaa, mee ga hagatanga hua luada dono daiaa. ▼ 8Nia malama e logo e haula i lodo di ruum i nua, di gowaa dela e dagabuli gimaadou. 9Tama daane, dono ingoo go Eutychus e noho i di bontai i nua, gei di waalooloo o Paul e helehelekai, Eutychus la gu molemoe, gu kii danu mmoe, gu doo ia i nua i di tolu baba, gu doo gi hongo nia gelegele. Gei digaula ga dahi aga a mee, gei mee gu made. 10Paul ga haneia gi lala, ga haga haa ia gi hongo o mee, ga dahi mai a mee, ga bulubulu, ga helekai, “Goodou hudee lodo huaidu, mee e mouli huaigolo!” 11Paul ga hanaga labelaa gi nua, ga ginigini dana palaawaa, ga gai. Gei mee ga helehelekai gi digaula ga dae loo gi di luada. Nomuli, gei mee ga hagatanga i nadau baahi. 12Gei digaula ga lahi tama daane dela gu mouli gi dono hale, gei digaula gu manawa lamalia.Mai Troas gi Miletus
13Gimaadou ne hula i mua gi di wagabaalii, ga dele gi Assos, di gowaa dela belee hagauda a Paul go gimaadou. Mee ne hai mai gi gimaadou bolo gimaadou gi heia di mee deenei, idimaa, mee ga hana hua i lala gi golo. 14Di madagoaa a mee ne heetugi mai gi gimaadou i lodo Assos, gimaadou ga haga uda a mee, ga dele gi Mitylene. 15Gimaadou ne hagatanga i golo, ga dau i tenua go Chios dono daiaa. Di laangi e dahi nomuli, gei gimaadou ga loomoi gi tenua go Samos. Muli di laangi deelaa, gimaadou ga dau i Miletus. 16Paul gu baba bolo ia e dele hua gi mua, e diiagi Ephesus, i mee e de hiihai di hagauwwou dono madagoaa i lodo tenua go Asia. Mee e hagalimalima huoloo bolo gi dau i Jerusalem, be di maa e mee i mua di laangi Pentekos.Di agoago haga maewae a Paul ang gi digau mmaadua daumaha Ephesus
17Paul ne hai dana hegau gi digau mmaadua daumaha o di nohongo dabu Ephesus gi loomoi e heetugi ang gi deia i Miletus. 18Di madagoaa digaula ne dau i baahi o mee, gei mee ga helekai gi digaula, “Goodou gu iloo di hai o dogu noho i godou baahi, mai taamada di laangi ne gila mai iei au gi goodou i tenua go Asia. 19Au nogo hai agu hegau manawa hila gi lala ge e dangidangi i nia madagoaa haingadaa ala ne tale mai gi di au mai i baahi digau o Jew, i nadau hai baahi mai gi di au i agu hegau gi di Tagi. 20Goodou e iloo bolo au digi hagammuni agu mee i goodou, nia mee ala e iloo eau bolo e mee di hagamaamaa goodou i agu agoago mo aago goodou, i lodo di gowaa dogologo mo i lodo godou hale. 21Au ne aago digau o Jew mo digau tuadimee bolo digaula gi huli gi daha mo nadau huaidu, gi huli ang gi God, gei gi hagadonu ina di Tagi go Jesus. 22Dolomeenei gei au ga hana gi Jerusalem, i dogu hagalongo gi di Hagataalunga Dabu. Au e de iloo be di maa di aha dela ga hai mai gi di au i di gowaa deelaa. 23Dela hua dagu mee e iloo eau bolo i lodo nia waahale huogodoo ala ne hana ginai au, di Hagataalunga Dabu e haga modongoohia mai bolo di lawalawa mo di haingadaa le e tale mai. 24Au hagalee haga dahidamee dogu mouli, dela hua dagu mee belee haga gila aga la go dogu duhongo hegau, dela ne dugu mai go Tagi go Jesus mai gi di au, bolo gi hagadele ina di Longo Humalia o tumaalia o God. ▼ 25Au gu hagadele i godou mehanga huogodoo mo di aago adu gi goodou di hai o Tenua o God. Gei dolomeenei, au e iloo bolo deai tangada i goodou ga gidee au labelaa ai. 26Au e hai dagu boloagi adu gi goodou dangi nei, maa tangada i goodou ga ngala, la hagalee dau mai gi di au, 27idimaa, au digi dugu hagammuni i goodou dahi mee. Au gu hagi adu gi goodou di manawa o God hagatau. 28Goodou gi bida pula i goodou mo di hagabuulinga siibi ala ne dugu adu go di Hagataalunga Dabu gi goodou bolo gi benabena ina. Goodou gi hai digau hagaloohi di nohongo dabu a God ne hai mee ginai mai i nia dodo o dana Dama daane. 29Au e iloo bolo i muli dogu hagatanga, nia paana lodo geinga la ga loomoi gi godou mehanga, ga hagalee dumaalia gi di hagabuulinga siibi gi humalia nadau mouli. 30Di madagoaa ga dau mai, gei hunu daangada i godou baahi ga halahalau digau ala ne hagadonu gi nia helekai tilikai belee dagi digaula i nadau muli. 31Gi pula i goodou, gei gi langalangahia bolo au e dangidangi i goodou i di boo mo di aa, i dagu hai agoago adu gi goodou huogodoo i nia ngadau e dolu. 32Gei dolomeenei, au e dugu adu gi goodou di madamada humalia o God mo nnelekai o dono dumaalia. Go mee dela e mee dana haga gila aga goodou, ge e gowadu gi goodou nia maluagina oona ala e benebene go mee ang gi ana daangada huogodoo. 33Au hagalee moinaa eau nia silber be nia goolo be nia goloo. 34Goodou e iloo bolo au e ngalua gi ogu lima, e hai nia mee huogodoo ala e hiihai ginai au mo ogu ihoo. 35Au gu haga modongoohia adu gi goodou nia mee huogodoo bolo gi ngalua gidaadou hagamahi belee hagamaamaa digau ala e paagege. Gidaadou gi langahia labelaa nia helekai a Tagi go Jesus ala ne bida helekai ai boloo: Di wanga le e mada haga maluagina i di kae.” 36Di madagoaa a Paul ne haga lawa ana helekai, mee mo digau ala madalia a mee gu dogoduli gi lala, ga dalodalo. 37Digaula huogodoo gu bulubulu mai a Paul, gu dangidangi, gu hongihongi a mee. 38Digaula gu lodo huaidu gi telekai a maa dela bolo digaula ga de gidee a mee labelaa. Gei digaula ga hula i muli o mee gi di wagabaalii.
Copyright information for
KPG